प्रदेशहब संवादाता
मकवानपुर । बागमती प्रदेश सरकारको विकास बजेट खर्च प्रभावित भएको छ । केन्द्रीय सत्ता समीकरण अनुसार सरकारबाट नेपाली कांग्रेस बाहिरिएपछि प्रदेश सरकारका ६ मन्त्रालय मन्त्रीविहीन अवस्थामा छन् ।
विगत १९ दिनदेखि मुख्यमन्त्री शालिकराम जम्कट्टेलले ६ मन्त्रालयको जिम्मेवारी आफैँसँग राखेका छन् । उनी सरकार टिकाउन काठमाडौँकै दौडधुपमा छन् भने उनले सम्हालेका ६ मन्त्रालयका सचिव तथा कर्मचारीहरू बजेट कार्यक्रम तथा नीतिगत निर्णयका लागि विभागीय मन्त्रीको पर्खाइमा छन् ।
मन्त्री नहुँदा कतिपय निर्णय गर्न मुख्यमन्त्रीसँगै भेट गर्न पुग्नुपर्ने अवस्था रहेको एक सचिवले जानकारी दिए । स्वीकृत वार्षिक कार्यक्रम प्रस्ताव गर्दा सम्बन्धित मन्त्रीको मोडल र अहिले मुख्यमन्त्री तथा कर्मचारी तर्फबाट अघि बढाउँदा केही समस्या हुने उनले बताए ।
मन्त्रालयमा विभागीय मन्त्री नहुँदा स–साना समस्या र नीतिगत निर्णयका लागि पनि मुख्यमन्त्रीलाई नै कुर्नुपर्ने बाध्यात्मक अवस्था रहेकाले समयमै आवश्यक निर्णय हुन नसक्ने ती सचिवको भनाइ छ ।
