प्रदेशहब संवादाता
अल्छी लाग्दा औंला, घाँटी पड्काउने धेरैको बानी हुन्छ । कम्प्युटरमा काम गर्दा वा केही सोच्दा बारम्बार आफ्नो औंला पड्काउने धेरैले गरिरहेका हुन्छन् । यसले आलस्य र थकानबाट छुटकारा दिने उनीहरुको तर्क हुन्छ ।
तर प्रश्न उठ्छ त्यसो गर्नु सही हो कि गलत ? के यसो गर्दा औंला र घाँटीलाई साँच्चै आराम मिल्छ कि हानि हुन्छ ?हड्डीको जोर्नीमा जुन तरल पदार्थ हुन्छ, त्यसमा रहेको फोका फुट्नाले यस्तो आवाज निस्कने गर्छ । औंला वा घाँटी पड्काउने बानी राम्रो होइन, यसले जोर्नीमा असर पुर्याउन सक्छ ।
बारम्बार औंला पड्काउँदा जोर्नीका कोषिकाहरु बिग्रन थाल्छन् । जसकारण हातको जोर्नीको पकड कमजोर हुन्छ । बारम्बार औंला पड्काउँदा केही समयपछि जोर्नी सुन्निने र दुख्ने हुन सक्छ ।
लामो समय पड्काउँदा हड्डी कमजोर हुन सक्छ ।औंला पड्काउँदा तत्काल दुखाइ हुँदैन, तर बिस्तारै औंलाको जोर्नीमा दुखाइ हुन थाल्छ । किनभने बारम्बार औंलाहरू पड्काउँदा तिनीहरू बीचको तरल पदार्थ कम हुन थाल्छ । तरल पदार्थ धेरै कम भयो भने बाथको समस्या हुन सक्छ । यदि बाथरोगबाट पीडित व्यक्तिको औंला पड्काउने बानी छ भने उसको लागि अझ हानिकारक हुन सक्छ ।
कतिपयको औंलासँगै घाँटी र ढाड पनि पड्काउने बानी हुन्छ । घाँटी र ढाड पड्काउँदा जोर्नीमा खुकुलोपनको समस्या हुन सक्छ, यसले जोर्नीलाई कमजोर बनाउँछ ।
ध्यान दिनुपर्ने कुरा
औंला पड्काउने बानी छ भने त्यो बानीलाई छोड्नुपर्छ । औंला वा गर्दनमा दुखाइ छ वा कडा भने त्यसलाई पड्काउनु भन्दा दुखाइको कारण पत्ता लगाउन चिकित्सकको सल्लाह लिनुपर्छ । फिजियोथेरापी गर्नुपर्छ ।
धेरै जोडले औंला पड्काउँदा कहिलेकाहीं औंला भाँच्चिने जोखिम पनि हुन्छ । यस्तो भएमा हाडजोर्नी विशेषज्ञको सल्लाह लिनुपर्छ ।
