प्रदेशहब संवादाता
काठमाण्डौँ । भारतीय महिला आई–लिग खेल्न नेपाली राष्ट्रिय टोलीकी गोलकिपर एञ्जिला तुम्बाप्पो सुब्बा र रक्षक गीता राना भारततर्फ प्रस्थान गरेका छन् । आई–लिग क्लब सेथु एफसीमा आबद्ध उनीहरू दुवैजना आइतबार त्यसतर्फ गएका हुन् ।
एञ्जिलाले सेथुबाट लगातार दोस्रो संस्करण खेल्न लागेकी हुन् । गत संस्करण सेथु सेमिफाइनलमा किक स्टार्ससँग पराजित भएको थियो ।
गीताले गत संस्करण सेथुसँग सम्झौता गरेको भए पनि चोटका कारण प्रतियोगिता गुमाएकी थिइन् । गत संस्करणमा ६ नेपाली खेलाडीले आई–लिग खेलेका थिए ।
योपटक दुई नेपाली खेलाडीको मात्र टुंगो लागेको छ । तीनपटक आई–लिगको उपाधि जितेकी स्ट्राइकर सावित्रा भण्डारी इजरायलको लिगमा अनुबन्ध भइसकेकी छन् । आई–लिगमा योपटक उनलाई देखिने छैन ।
आई–लिगको पहिलो खेलमा सेथुले यही डिसेम्बर ८ मा साविक विजेता गोकुलम केरेलासँग खेल्नेछ ।
प्रतियोगितामा योपटक सात टोली सहभागी छन् । सेथुसँगै साविक विजेता गोकुलम केरला,किक स्टार्स,उडिसा एफसी,इस्ट बंगाल,होप्स एफसी र स्पोर्ट्स उडिसाले सहभागिता जनाएका छन् । लिग मार्चसम्म चल्नेछ ।
