प्रदेशहब संवादाता
काठमाण्डौँ । भूकम्प प्रभावितका लागि अस्थायी आवास निर्माणमा खटेको पाल्पाली टोलीले ४३ वटा अस्थायी घरटहरा निर्माण गरेको छ । भूकम्पबाट प्रभावित जिल्ला रुकुम पश्चिममा पुगेर पाल्पाको टोलीले ४३ वटा अस्थायी घरटहरा र दुई वटा विद्यालय बनाएको टोलीका संयोजक एवम् प्रतिनिधि सभाका सदस्य नारायणप्रसाद आचार्यले जानकारी दिनुभयो ।
टोलीले आठबिस्कोट–१३ घेत्मामा ४३ वटा घरटहरा बनाएको हो । यस्तै, भूकम्पबाट क्षतिग्रस्त दुई वटा विद्यालयका अस्थायी संरचना बनाएको आचार्यले जानकारी दिनुभयो । नेकपा एमालेले सञ्चालन गरेको भूकम्पले ढलेका संरचना उठाउने अभियान अन्तर्गत आफूहरूले त्यहाँका प्रभावित नागरिकका लागि आवश्यक अस्थायी संरचना बनाएको उहाँले बताउनुभयो ।
पाल्पाबाट टोली रुकुम पश्चिममा गत मङ्सिर ५ गते गएको थियो । १४ दिनसम्म लगातार खटेर भूकम्प प्रभावितका लागि अत्यावश्यक संरचना निर्माण गरेर फर्किएको एमाले पाल्पाका उपाध्यक्ष देवीलाल लामिछानेले बताउनुभयो ।
